Сүүлийн жилүүдэд дэлхий дахинд нийгмийн үе, үе хоорондын ялгаа нь зөвхөн нийгмийн салбарын бус бүх шинжлэх ухаанд хамаарахуйц өргөн цар хүрээг хамарсан судлагдахуун болоод байна. Социологийн шинжлэх ухаанд нийгмийн үеийн ангилал, үе хоорондын ялгаатай байдлыг нарийн судалж, өндөр хөгжилтэй улс орнууд нийгэм, эдийн засгийн онцлог шинжээс хамаарсан нийгмийн үеийн ангиллыг гарган ашиглаж байна. Монгол Улсын нийгэм, эдийн засгийн онцлогт тохируулан нийгмийн үе, үе хоорондын ялгаатай байдлыг тодорхойлсноор бизнесийн байгууллагууд, судлаачид, төрийн бодлого боловсруулагч нарт чухал ач холбогдолтой судалгаа бий болох юм.